Cohonbros

Es una casa que esta dentro del “adarve de los Cogonbros”,  Esta situada en la colación de S. Juan de la Leche, la localisa en la manzana del Palacio Arzobispal.. ocupaba parte de la plaza del ayuntamiento.

CH_VO_04 *1439

Fol. 40r: Las casas que eran Almajara del cabilldo tienelas Juan gonçales pericon por preçio de quatroçientos maravedis e tomolas en primero dia de Junio Año de 34 Años.

En 16 de mayo Año de 1439 Años fueron deslindadas estas casas por Juan dias rraçionero e mayordomo de la eglesia de toledo. Et pasolas el dicho Juan gonçales A las casas sobre dichas. Et han por linderos de la una parte casas de la eglesia e de la otra casas del Arçobispo. Et entrando por las dichas casas del dicho Juan gonçales A estas tiene un portal fasta un patin que ha en luengo ocho varas e media e en Ancho dos varas. Et en este portal esta un callejon que sale A la puerta prinçipal destas dichas casas, la qual salle A las casas del Arçobispo en el qual callejon ha en luengo onse varas e en Ancho tres varas. Et luego tiene un patin Et A la mano derecha del tiene un palaçio que ha en luengo quatro varas e en Ancho otras quatro. Item luego çerca del otro palaçio que ha en luengo quatro varas e en Ancho tres varas. Et despues esta otro palaçio en fruente que ha en luengo con una Alhania dose varas e media e en Ancho tres varas e media Et ensomo del dos suelos uno sobre otro . Et el primero es de la medida del dicho palaçio. Et en el de ençima esta un Alholi que ha en luengo ocho varas e media e en Ancho tres varas e media. Et enderredor del dicho patin estan sus andores. Et A la mano esquierda del dicho patin esta una camara sobre la calleja del Arçobispo que ha en luengo nueve varas e en Ancho dos varas e media. Et ensomo della un Andor para tener gallinas e de su medida. Testigos Alvaro de avila e el dicho Juan gonçales pericon.

(firmado) Ludovicus Luppi apostolico e ordinario notario.

(En el margen izquierdo, en otra letra) tienelas el bachiller diego del castillo.[i]

[i] (En el margen izquierdo, en otra letra) tienelas el bachiller diego del castillo.