“MEDIEVALGIS” TOLEDO: ESPACIO y TIEMPO.

www.medievalgis.eu

contact@medievalgis.eu

código parcela: 5789-código casa: AE_01

aCH_ AE_01 *1439

casa cerca del Baño de Hamaseite

Las casas que fueron de don mose e de clara la mostrença tienelas ynes Alvares muger de françisco? Alvares de Alarcon çenso por ochenta maravedis.

En 17 de Junio Año de 1439 Años fueron deslindadas estas casas por Juan dias Raçionero e mayordomo de la eglesia de toledo e ha por linderos de la una parte el esquina e de la otra parte casas de don yuçaf chofen. Et tiene en la entrada un portalejo pegado con el patin e A la mano esquierda del dicho patin esta un palaçio que ha en luengo syete varas e en Ancho quatro varas e ensomo una camara de su tamaño e debaxo un sotano de su tamaño. Et Adelante deste palaçio esta un callejon de una letrina que ha en luengo siete varas e dos terçias. Et Adelante esta otro palaçio que ha en luengo siete varas e dos terçias e en Ancho tres varas. Et çerca del una cosina que ha en luengo tres varas e media e Al tanto en Ancho. Et ensomo destos palaçio e cosina esta una camara de su tamaño e con su sotano debaxo. Et en frente esta otro palaçio que ha en luengo syete varas e media e en Ancho quatro varas Et dentro del una quadra que ha en luengo seys varas e en Ancho tres varas e dos terçias. Et A la otra parte del dicho palaçio esta otra quadra senblante de la sobre dicha. Et ensomo destos palaçio e quadras estan sus camaras de su tamaño e unos corredores. Testigos ferrand alonso rraçionero e Juan gonçales de vargas capellan de la dicha eglesia.

(firmado) Ludovicus Luppi apostolico ordinario notario.

bCH_AE_01 *1492

E-1 Las casas que solia tener Ynes Alvares, tienelas agora donna Aljohar. muger de don Salamon con ensomo (?) por presçio de ochenta mrs. de çenso han por linderos (rien)

En primero dia del mes de jullio del dicho anno de noventa e un annos el venerable sennor Alvar Peres de Montemayor canonigo e vesytador de las posisiones de la santa yglesia de Toledo deslyndo estas casas e fallose en ellas en la entrada un portalejo pegado con el patin e a la mano ysquierda del dicho patin ay un palaçio en que ay siete varas en largo e quatro en ancho e ensomo una camara de su tamanno e debaxo un sotano de su tamanno, e adelante deste palaçio esta un callejon de un alatrina que ay en el siete varas en largo e dos terçias en ancho e adelante esta otro palaçio en que ay quatro varas e dos terçias en largo e tres en ancho e çerca del una cosina en que ay tres varas e media en largo e otro tanto en ancho e ensomo deste palaçio e cosina esta una camara de su tamanno con su sotano debaxo e enfruente esta otro palaçio en que ay siete varas en largo e quatro en ancho e dentro del una quadra en que ay seys varas en largo e tres e dos terçias en ancho e de la otra parte del dicho palaçio esta otra quadra senblante de su tamanno e unos corredores. De que fueron testigos Diego de Obregon e Diego Serrano criados del dicho sennor Alvar Peres. (signé) Juan de Mayorga notario apostolico.