aCH_ UO_02 *1439

La segunda tienda que esta Junta con esta tienela diego rrodrigues mayordomo de pero carrillo por preçio de mill e dosientos maravedis e tomola en treze dias de mayo Año de veynte e quatro.

En 16 de mayo Año de 1439 Años fue deslindada esta tienda por Juan gonçales cornejo canonigo e Juan dias rraçionero e mayordomo de la eglesia de toledo. Et ha por linderos de cada parte casas de la eglesia, en esta casa ha en luengo ocho varas e en Ancho syete varas. Et tiene un sotano con su puerta a la calle de su mesma medida. Et ensomo tiene una camara de su tamaño. Testigos Alvaro de avila capellan e gonçalo Alfonso Roxel.

(firmado) Ludovicus Luppi apostolico e ordinario notario.

bCH_UO_02 *1492

-Las otras casas que estan junto con estas, tienelas agora el dicho Alfon de Beserril por vida suya e de su muger e de un heredero por presçio de mill e çient mrs. e çinco gallinas, alindan de la otra parte con casas de la iglesia.

En dies e ocho dias del mes de mayo del dicho anno de noventa e un annos el venerable sennor Alvar Peres de Montemayor canonigo e vesitador de las posisiones de la santa yglesia de Toledo deslindo estas casas e fallose en ellas un portal de quatro varas e media en largo e otro tanto en ancho con unas troxesilas pequennas con una camara ensomo de al tanto. Que fueron testigos Anton de Mesa criado del sennor Cristoval de Villaminaya e Diego de Obregon criado del dicho sennor Alvar Peres. Esto conçierta con el libro viejo. (signé) Juan de Mayorga notario apostolico. /f° 79 r°/