“MEDIEVALGIS”
TOLEDO: ESPACIO y TIEMPO.
www.medievalgis.eu
contact@medievalgis.eu
código parcela:
4486 – código casa: FO_01
J.P.2018 –
Jesús, callejón de. N°4.
aCH_FO_01 *1439
Las casas que solia tener maria Alvares e ynes Alvares tienelas maria garçia muger que fue de alfonso sanches de sant martin por preçio de çiento e ochenta maravedis e tomolas en syete dias del mes de enero Año de 33 Años.
En çinco dias de março Año de 1439 Años fueron desygnadas las casas suso dichas por Juan dias rraçionero e mayordomo de la eglesia de toledo por Ante mi Juan gonçales cornejo canonigo e notario e testigos yuso escriptos las quales son en el rrencon de la callejuela que es cabe el forno de sant Antolin e deslindan de la una parte con casas pequeñas de Juan gonçales de sant fuent salida e de la otra con casas de sant antolin e lo que se fallo en ellas es esto que se sigue: primeramente A la entrada un portal que ha en el en luengo çinco varas e media e tres varas en ancho. Et en entrando Al patin una cozina A la mano derecha que ha en luengo quatro varas e tres en ancho. Et de frente un palaçio con una grada el palaçio doblado con una camara que ha en el en luengo ocho varas e en ancho quatro varas. Et la camara de ençima del de su tamaño e A la mano esquierda una como casa portal doblado con dos Apartados en ello uno en lo baxo e otro en lo Alto e ha en luengo ocho varas e media e en ancho tres varas e quarta. Testigos alonso ortiz thesorero de santa Leocadia extramuros e alonso gonçales capellan de la dicha eglesia de toledo.
(firmado) Iohanes martinus notario Canonicus Toletanus.
bCH_FO_01 *1492
Las casas que solia tener Gonçalo de Sant Antolyn, tienelas agora Catalina Alvares muger de Garçia de Burgos por su vida, por presçio de quatroçientos e veynte e quatro mrs. Han por linderos de la una parte casas de Tomas Gaytan.
En iii dias del dicho mes de abril del dicho anno de noventa e dos annos los dichos sennores vesitadores en presençia del notario e de los testigos ynfra escriptos vesitaron estas casas e fallose en ellas en la entrada una casa puerta en que ay quatro varas e media en largo e tres en ancho, e ensomo dos suelos, e entrando un patio pequenno ladrillado, e frontero esta un palaçio en que ay quatro varas e media en largo e dos en ancho, e ensomo una camara de su tamanno. De que fueron testigos Diego de Obregon e Françisco de Morales criados de los dichos sennores. (signé) Juan de Mayorga notario apostolico. /34 r°/.