CH_ BC_4001 *1439

Las Casas que fueron del coletor que son dentro en el Adarve del forno de sant soles por preçio de mill e quatroçientos e treynta maravedis e tomolas en 11 de Agosto Año de 34 Años.

En 16 de Junio Año de 1439 Años fueron deslindadas estas casas por Juan dias Raçionero e mayordomo de la eglesia de toledo. Et ha por linderos de la una parte casas de Alfonso Rodrigues bachiller e de la otra parte casas de martin ferrandes de bonilla. Et tiene en la entrada un portal que ha en luengo çinco varas e dos terçias e en Ancho tres varas. Et ensomo una cosina de su tamaño. Et luego esta un patin e A la mano esquierda esta un palaçio que ha en luengo siete varas e dos terçias e en Ancho quatro varas e ensomo una camara de su tamaño. Et Adelante esta una camara sobre las casas de pero Alfonso de oviedo Jurado e ha en luengo nueve varas e dos terçias e en Ancho tres varas e media. Et en fruente estan dos Palaçios uno sobre otro. El primero ha en luengo onse varas e dos terçias e en Ancho quatro varas. El segundo es de la longura del primero e ha en Ancho tres varas. Et debaxo de Amos esta una bodega de su tamaño. Et Adelante destos dos palaçios esta una camara que ha en luengo dies varas e en Ancho quatro varas Et debaxo un establo de su tamaño. Et çerca deste establo esta un corral pequeño con su puerta A la calle çerca de martin ferrandes de bonilla e çerca de los dichos Palaçios esta una Açotea descobierta. Et çerca della una camara pequeña que ha en luengo siete varas e en Ancho quatro varas e media e debaxo un portal que toma la puerta del corral. Testigos ferrand Alfonso Raçionero e Juan sanches capellan de la dicha eglesia.

(firmado) Ludovicus Luppi apostolico e ordinario notario.