Casa situada entre dos casas identificada BL_15 y BL_18

CH_BL_20 *1439 

Las Casas que tenia martin gonçales cura de sant ysute tienelas garçia gonçales Raçionero cada Año por quinientos e dies maravedis e tomolas en 11 de Junio Año de 34 Años.

En 9 de Jullio Año de 1439 Años fueron deslindadas estas casas por Juan dias Raçionero e mayordomo de la eglesia de toledo Et ha por linderos de la una parte casas de la dicha eglesia e de la otra casas de sant yuste. Et tiene en la entrada un portal que ha en luengo siete varas e terçia e en Ancho quatro varas e media. Et ensomo una cosina de su tamaño. Et luego esta un patin e A la mano derecha esta un palaçio que ha en luengo seys varas e dos terçias e en ancho tres varas e quarta e ensomo una camara e debaxo un sotano de su tamaño. Et A la otra mano esta otro palaçio que ha en luego seys varas e dos terçias e en ancho tres varas e quarta. Et ensomo una camara de su tamaño partida en dos partes con sus corredores e portales en derredor del dicho patin. Testigos diego martines capellan e Juan martines garrido.

(firmado) Ludovicus Luppi apostolico e ordinario notario.

CH_BL_20 *1492

Las casas que solia tener Diego Gonçales Castellano notario con cargo de seteçientos mrs. e un par de gallinas de çenso, tienelas agora Françisco Castellano trapero su fijo. Ha por linderos de la una parte casas de Pedro Gonçales de Ayllon canonigo e de la otra parte el esquina.

En xxii dias del dicho mes de novienbre del dicho anno de noventa e un annos el venerable sennor Cristoval de Villaminaya vesitador de los posisiones de la santa iglesia de Toledo e por ante mi Alvar Peres de Montemayor notario apostolico canonigos en la dicha santa iglesia e ante los testigos de yuso escriptos deslindo estas casas e fallose en ellas en la entrada un portalejo que tiene tres varas e quarta en largo e tres en ancho, e mas adentro otro portal en que ay ocho varas en largo e tres en ancho por lo mas ancho, e a la mano ysquierda otro portal en que ay çinco varas en largo e una /f° 214 v°/ en ancho, e un palaçio en que ay tres varas e quarta en largo e otras tres e quarta en ancho, e debaxo un sotano del tamanno del dicho palaçio e portales con un soberado ensomo de al tanto de todas estas pieças e frontero un palaçio en que ay honze varas en largo e tres e dos terçias en ancho, con dos soberados ensomo de al tanto e a la mano derecha del dicho patyn un palaçio que tiene la puerta en medio del escalera en que ay quatro varas en largo e otras quatro en ancho, con sotano debaxo con sus corredores altos e baxos. De que fueron testigos Diego de Obregon e Françisco de Sant Roman criados de los dichos sennores. (signé) Juan de Mayorga notario apostolico.